Ирландиялық UFC жұлдызы Конор Макгрегор ауыр салмақтың аңызы Майк Тайсонмен кездесіп, оған бокстың «қыр-сырын» түсіндірген сәтін көрсетті. Желіде тараған видеода Конор рингтегі қозғалыс пен соққыларды көрсетіп, Тайсонға тактикалық «кеңес» беріп тұрғандай әсер қалдырады.
Видео сипаттамасында Макгрегор Тайсонға өзінің рингтегі тәжірибесін бөлісіп, бірнеше техникасын көрсеткені айтылады. Ирландиялық файтер қол жұмысын, корпусқа қозғалысты және бірқатар соққы комбинацияларын түсіндіріп, кәдімгі жаттықтырушыдай сөйлейді.
Алайда көріністің басты интригасы – Майк Тайсонның реакциясы. Оның жүзі мен қимылы бір жағынан сыпайы тыңдап отырғандай. Екінші жағынан «маған бұл базалық нәрселерді түсіндірудің қажеті бар ма?» дегендей күлкілі, екіұшты әсер қалдырады.
Жанкүйерлердің көбі бұл сәтті мысқыл аралас әзіл ретінде қабылдап, пікір қалдыруда.
Айта кетсек, Конор Макгрегор кәсіби бокста бар болғаны бір рет өнер көрсетті. Ол 2017 жылы рингке шығып, жеңілмеген америкалық жұлдыз Флойд Мейвезерге қарсы айқасқан.
Ал Майк Тайсон болса, жасының ұлғайғанына қарамастан рингтен толық қол үзген жоқ. Ауыр салмақта әлемді дүр сілкіндірген «Темір Майк» соңғы жылдары көрме (эксибишн) жекпе-жектеріне шығып жүр. 2026 жылдың көктемінде Флойд Мейвезермен кезекті шоулық айқас өткізу жоспарланған. Соңғы рет ол былтыр қараша айында рингке шығып, блогер-боксшы Джейк Полға төрешілер шешімімен жол берген.
