Жанкүйерлер арасында дау тудырған бұрынғы бапкері Стефано Вуков WTA тарапынан тыйым салынғанына қарамастан, қазақстандық теннисшімен қайтадан ресми түрде жұмыс істеуге ниетті.
Қазақстандық теннис жұлдызы Елена Рыбакина тағы да жанкүйерлер мен сарапшылар назарына ілікті. Бұл жолы спорттық емес, жеке менеджментке қатысты мәселе қызу талқылануда.
Журналист Джордан Рейнольдс (Tennis-infinity.com) жазғандай, Рыбакинаның бұрынғы жаттықтырушысы Стефано Вуков спорттан шеттетілгеніне қарамастан, теннисшінің командасына қайта оралуды көздеп отыр. Оның үстіне Вуков WTA тарапынан салынған тыйымды алып тастау үшін ресми түрде апелляция берген.
The Athletic басылымының дерегінше, Вуков қазіргі таңда Елена Рыбакинаның агенті ретінде әрекет етіп жүр және болашақта оның барлық коммерциялық істерін басқарғысы келеді. Бұл жағдай сарапшылар мен жанкүйерлер арасында алаңдаушылық тудыруда.
«Егер Вуков Рыбакинаның қаржылық және жарнамалық бағыттағы шешімдеріне ықпал ететін болса, ол оған толық бақылау орнатады. Бұл тәуелділікті одан әрі тереңдетуі мүмкін», — делінген мақалада.
Рыбакинаның өзі Стефано Вуковтың тарапынан ешқандай қысым немесе дөрекілік болмағанын айтып, оны қорғап келеді. Ол Вуковтың өзінің өміріндегі маңызды тұлға екенін бірнеше рет мәлімдеген. Алайда сарапшылар бұл пікірдің өзі Вуковтың ықпалының нәтижесі болуы мүмкін екенін жоққа шығармайды.
Қазіргі таңда Вуковқа қойылған тыйымның жойылатыны немесе жойылмайтыны нақты емес. Дегенмен, бір нәрсе анық — Вуков Рыбакинадан алыстамақ емес. Ал жанкүйерлер бұл байланыс спортшының мансабына қалай әсер ететінін алаңдаумен отыр.
