UFC-дің бұрынғы екі салмақ дәрежесіндегі чемпионы Конор Макгрегор Майкл Чендлер мен Пэдди Пимблетт арасындағы жекпе-жекке бәстесіп, 500 мың долларынан айырылып қалды.
Майамиде өткен UFC 314 турнирінің қосалқы басты жекпе-жегі — Майкл Чендлер мен Пэдди Пимблетт арасындағы кездесу болды. Бұл жекпе-жекке ерекше назар аударған жанкүйерлер арасында Конор Макгрегор да бар еді.
Ирландиялық жұлдыз бұл кездесуде Чендлердің жеңісіне сеніп, оның нокаутпен немесе техникалық нокаутпен жеңіске жетуіне 500 мың доллар көлемінде бәс тіккен. Егер оның болжамы дұрыс шыққанда, 2,5 миллион доллар пайда көрер еді.
Бірақ кездесу күтпеген нәтижемен аяқталды. Пэдди Пимблетт Чендлерді үшінші раундта техникалық нокаутпен жеңіп шықты. Осылайша Макгрегордың үміті ақталмай, ірі сомадағы қаражаттан айырылып қалды.
