Қазақстандық боксшы Санатәлі Төлтаев Сауд Арабиясында өтіп жатқан ерекше Гран-при турнирін сенімді жеңіспен бастады.
Сауд Арабиясында WBC және Турки әл аш-Шейх ұйымдастырған ауқымды бокс турнирінде Санатәлі Төлтаев 1/16 финалдық кезеңінде шаршы алаңға шықты. Оның қарсыласы — Венесуэла елінің өкілі Герман Брочеро болды.
Жекпе-жек бірінші жартылай орта салмақта өтті және алты раундқа жоспарланған еді. Жекпе-жектің басынан-ақ Төлтаев шабуылда белсенді болып, қарсыласын тығырыққа тіреген. Нәтижесінде төреші бұдан әрі жекпе-жекті жалғастырудың мәні жоқ деп шешіп, қазақстандық боксшыға техникалық нокаутпен жеңіс берді.
Бұл Санатәлі Төлтаевтың кәсіби мансабындағы үшінші жеңісі болды. Айта кету керек, Герман Брочеро үшін бұл алғашқы жеңіліс.
1/16 финалдағы жеңіс үшін Төлтаев 15 000 АҚШ долларын иеленді. Ал жеңілген боксшы 7 500 доллар көлемінде сыйақы алады.
