Бокстан "Thailand Open" халықаралық турнирінің ширек финалдық кезеңі басталды. 70 келіге дейінгі салмақ дәрежесінде қазақстандық Төрехан Сабырхан филиппиндік Чавез Роналдты жеңді.
Төрехан Сабырхан жекпе-жек басталған бетте-ақ қарсыласын қыспаққа алып, жоғары қарқында шабуылға көшті. Филиппиндік боксшы алғашқы минуттардан қысымға төтеп бере алмай, қорғаныспен әлек болды. Төреханның нұсқалы және дәл соққылары қарсыласының басына жиі дөп тиіп, оның жоспарын күйретті.
Алғашқы екі раундта Төрехан қарсыласын шаршатуға тырысты. Қимылдауға мүмкіндік бермей, бірінші нөмірмен жұмыс істеді. Чавез Роналд шабуылдаудан қалып, ұстамсыз әрі сенімсіз әрекеттерге көше бастады.
Шешуші раундта Төрехан жекпе-жекті мерзімінен бұрын аяқтауға бар күшін салды. Ол қарсыласына бірінен соң бірі бағытталған ауыр соққылар жаудырып, бұрышқа тіреп тастады. Әр соққы дәл және ауыр болып, Роналдқа тыныс алуға мүмкіндік қалдырмады.
Осы раундтың алғашқы 30 секундында-ақ филиппиндік спортшы тағы да нокдаунға түсіп, ринг бұрышынан шықпай қалды. Төрехан техникалық, тактикалық және физикалық тұрғыдан толық басымдық танытып, жекпе-жекті сенімді түрде аяқтады.
