Олимпиада чемпионы Данияр Елеусінов америкалық TKO Boxing лигасындағы дебютін әлем назарын аударған Канело – Кроуфорд кешінде өткізуі мүмкін. Бұл туралы боксшының менеджері Зия Алиев мәлімдеді,
Елеусінов соңғы жекпе-жегін 2024 жылдың қыркүйегінде Алматыда өткізген. Ол бесінші раундта филиппиндік Джо Нойнаяны техникалық нокаутпен жеңіп, WBC Peace тұжырымы бойынша белбеу иегері атанған. Бұл жеңіс оның кәсіпқой мансабында жаңа мүмкіндіктерге жол ашты.
Биыл Данияр UFC президенті Дэйна Уайт пен бокс саласының ірі инвесторы Турки әл аш-Шейх негізін қалаған TKO Boxing лигасына шақырту алды. Бұл ұйым қазіргі таңда 130-дан астам мықты спортшыны қамтиды.
“Данияр шілде айында АҚШ-та өтетін бой қыздыратын (разогревочный) жекпе-жекке қатысады. Ал қыркүйекте Канело мен Кроуфордтың суперкешінде рингке шығуы ықтимал. Бұл оның лигадағы алғашқы айқасы болады”, – дейді Алиев.
Жаңа лига UFC форматына негізделген. Онда өз белбеуі, ішкі рейтинг жүйесі мен жарнамалық стратегиясы болады. Алиевтің айтуынша, Елеусіновпен толыққанды келісімшарт жасалған, оның ішінде бонустар мен басқа да артықшылықтар қарастырылған.
“Егер Ryadh Season тарапынан топ-боксшылармен, мысалы Джарон Эннис не Шахрам Гиясовпен айқас өткізуге ұсыныс түссе, біз лигадан тыс та жекпе-жек өткізе аламыз”, – деді менеджер.
13 қыркүйекте мексикалық Сауль “Канело” Альварес пен америкалық Терренс Кроуфорд арасында супержекпе-жек өтеді. Әзірге айқастың өтетін орны нақты белгісіз.
Бұл кеш бокс әлеміндегі басты оқиғалардың бірі болмақ. Егер Елеусінов осы кардқа кірсе, бұл оның әлемдік аренадағы статусын арттырып, жаңа деңгейге көтеруі әбден мүмкін.
Айта кетейік, Данияр Елеусінов – Қазақстан боксы тарихындағы соңғы Олимпиада чемпионы. Ол 2016 жылы Рио-де-Жанейрода өткен жазғы ойындарда алтын медаль жеңіп алған.
