Қазақстандық ММА шебері Қуат "Найман" Хамитов UFC-дің бұрынғы жұлдызы Хорхе Масвидальмен бірлескен видеосын жариялады. Тәжірибелі америкалық спортшы қазақстандық файтерге еркін күрестен шеберлік сабағын өткізді.
Хамитов Instagram парақшасында америкалық спорт аңызы Хорхе Масвидальмен бірге түсірілген видеоны жариялап, оқырмандарын таңғалдырды. Кадрларда Масвидаль еркін күрестің классикалық әдістерінің бірі – артқа өтуді көрсетіп, оны Хамитовтың үстінде нақты көрсетіп береді.
Видео барысында кадр сыртындағы комментатор бұл тәсілді төрт ұпайлық кәсіби әрекет деп бағалайды. Осының нәтижесінде Хамитов қысқа ғана сәтте күрес аренасында емес, жаттығу залында "жеңіліс тапқандай" әсер қалдырады.
Белгілі спортшы өз жазбасында: "Хорхе Масвидальдан мастер-класс" деп қысқа ғана, бірақ нық пікір білдірді. Бұл кездесу – тек жаттығу емес, екі елдің спортшылары арасындағы достықтың, тәжірибе алмасудың жарқын үлгісі.
Хорхе Масвидаль ММА-де 52 жекпе-жек өткізіп, оның 35-інде жеңіске жеткен. UFC-де 22 рет октагонға шығып, 12 жекпе-жекте басым түскен. Сонымен қатар Камару Усманға қарсы екі мәрте титулдық айқас өткізген. Масвидаль – өзінің техникалық шеберлігімен, нокауттарға бай стилімен әлемге танымал.
