Жапонияның Йокогама қаласында IBF тұжырымы бойынша екінші жеңіл салмақтағы әлем чемпиондығы үшін талас аяқталды. Ринг иесі Масанори Рикиши мен мексикалық Эдуардо Нуньес арасындағы айқас нағыз бокс кешіне айналды.
Биыл бұл салмақта қызық жағдай қалыптасты: бұрынғы чемпион Энтони Какаче өз еркімен IBF белбеуінен бас тартты. Осылайша титул вакантты болып, IBF шешімімен оған рейтинг көшбасшысы Нуньес пен үшінші орында тұрған Рикиши үміткер атанды (екінші орын бос тұрған).
Айқас басталған сәттен-ақ Нуньес қысым жасап, үнемі алға ұмтылды. Ал Рикиши екінші нөмірмен жұмыс істеді. Бір раундта мексикалық боксшының оң жақтан жасаған соққысы жапондықты теңселтіп жіберді. Алайда Рикиши есінен танбай, жекпе-жекті соңына дейін жалғастырды.
12 раундқа созылған тартысты кездесуде төрешілер жеңісті бірауыздан Нуньеске беріп, оны жаңа әлем чемпионы деп таныды.
Осы сәтте рейтингтің төртінші сатысында орналасқан Сұлтан Зауырбек, яғни "Қазақ королі" күтпеген жақсы жаңалық естіді. Ол сәуір айында Астанада оңтүстікафрикалық Азунгу Фузилені жеңіп, позициясын нығайтқан. Рикишидің жеңілісі мен жаңа чемпионның анықталуымен Сұлтанның рейтингі жоғарылауы мүмкін. Сарапшылар оның бірінші не екінші орынға көтерілуі ықтимал екенін айтуда, бұл титул үшін жекпе-жекке жол ашуы мүмкін.
