Қазақстандық боксшы Сәкен Бибосынов ұлттық құраманың алдағы жоспарлары мен өзінің спорттық жағдайы туралы ашық пікір білдірді.
Сәкен Бибосынов 2024 жылы Таиландтың Чиангмай қаласында өткен Азия чемпионатында ауыр жарақат алып, операция жасатқан. Бұдан кейін спортшы үш ай демалыс алып, толық оңалды.
"Жарақаттан кейін үш ай демалдым. Алғашқы оқу-жаттығу жиыным Ресейдің Кисловодск қаласында өтті. Кейін Хабаровскідегі турнирге қатысып, жеңіске жеттім. Одан кейін Алматыда жиын өткіздік, қазір Бурабайдамыз. Құрама сапында алдағы жарыстарға тыңғылықты дайындалып жатырмын. Денсаулығым толық қалпына келді. Болашақта жанкүйерлеріме қуаныш сыйлаймын", – деді Бибосынов.
2021 жылы Сербияның Белград қаласында әлем чемпионы атанған Сәкен биылғы сәуірде Ресейдің Хабаровск қаласында өткен Константин Коротков атындағы халықаралық турнирде алтын медаль жеңіп алды. Бұл оның жарақаттан кейінгі алғашқы ірі жеңісі ретінде бағаланды.
Қазір Сәкен ұлттық құрамамен бірге алдағы халықаралық жарыстарға дайындалып жатыр. Жанкүйерлер оны рингте қайта көретін күн алыс емес.
