Қазақстан жастар құрамасы U-22 деңгейінде жаңа құраммен жасақталмақ. Бұл туралы Қазақстан бокс федерациясының бас хатшысы Мерей Ақшалов мәлімдеді.
Жақын арада World Boxing ұйымының қолдауымен өтетін жастар арасындағы U-22 әлем чемпионатына Қазақстан екі құраммен қатыспақ: негізгі ұлттық команда және Бақыт Сәрсекбаев басқаратын арнайы U-22 құрама.
"Бұл турнирге екі құрам жасақталады. Бірақ команданы жарысқа Бақыт Сәрсекбаев апарады. Оның құрамында Төрехан Сабырхан мен Санжар Тәшкенбай да болады. Олар көшбасшылар ретінде таңдалуы мүмкін немесе спарринг арқылы іріктеледі", — деді Мерей Ақшалов.
Қазақстандық бокс жанкүйерлері үшін Төрехан Сабырхан мен Санжар Тәшкенбай жас болса да, өздерін дәлелдеген мықты спортшылар. Бұл екеуінің Бақыт Сәрсекбаев жаттықтыратын команда құрамында болуы жастар құрамасының күшеюіне оң ықпал етеді.
Жақында Шри-Ланка астанасы Коломбода өткен жастар арасындағы Азия чемпионатында Бақыт Сәрсекбаевтың шәкірттері 22 алтын медаль жеңіп алып, керемет нәтиже көрсетті. Бұл оның тәжірибесі мен жұмыс әдістемесінің тиімділігін дәлелдейді.
