Қазақстан әйелдер құрамасының капитаны Назым Қызайбай 2025 жылғы бокстан өтетін екінші әлем чемпионатына қатысатынын ресми түрде мәлімдеді.
Спортшы бұл жаңалықты Instagram парақшасында жаттығу сәтінен түсірілген бейнежазбамен жариялады.
“Бір жылда екі әлем чемпионаты. Біріншісі – қоржынымда. Енді екіншісіне дайындалып жатырмын. Дайындық қызу қарқынмен жалғасып жатыр”, – деп жазды Қызайбай әлеуметтік желіде.
Назым Қызайбай – Қазақстан боксы тарихындағы тұңғыш үш дүркін әлем чемпионы. Ол Чеджу (2014), Астана (2016) және биылғы Ниш (2025) қалаларында өткен әлемдік додаларда топ жарған еді. Оның бұл жетістігі ел спортындағы айрықша белес ретінде тарихқа енді.
Қыркүйек айында бокстан Ұлыбританияның Ливерпуль қаласында өтетін әлем чемпионаты Қызайбай үшін тағы бір мүмкіндік болмақ. Бұл турнир World Boxing ұйымының ұйымдастыруымен өтеді және онда әлемнің үздік спортшылары жиналады. Егер Назым бұл жолы да жеңіске жетсе, қазақ боксы тарихында бұрын-соңды болмаған рекорд орнатады.
Қызайбайдың дайындығы қарқынды жүріп жатыр. Ол күнделікті жаттығу барысында тек физикалық емес, психологиялық тұрғыдан да бабын келтіріп жатқанын аңғартты. Спортшының басты мақсаты – халықаралық аренада ел намысын абыроймен қорғау.
