Марокко астанасы Рабат қаласында каратэден жылдың басты додасы – Премьер-лиганың финалдық кезеңі мәреге жетті. Бұл турнирде маусым бойы үздік нәтиже көрсеткен спортшылар "Grand Winner" мәртебесіне ие болды. Қазақстан тарихында алғаш рет бірден екі спортшы осы жоғары атақты жеңіп алды.
50 келіге дейінгі салмақта бақ сынаған Мөлдір Жаңбырбай мен 61 келіге дейінгі салмақта өнер көрсеткен Әсел Қанай биылғы маусымда үздік атанып, "Grand Winner" атағына ие болды. Бұл — халықаралық каратэ аренасында бұрын-соңды болмаған жетістік.
Мөлдір Жаңбырбай үшін бұл — соңғы екі жылдағы екінші мәрте берілген марапат. Биыл ол Парижде өткен Премьер-лиганың бірінші кезеңінде қола медаль иеленсе, Ханчжоуда — күміс, ал Каирде алтын жүлдені қанжығасына байлады.
Әсел Қанай да биыл жоғары нәтижемен көзге түсті: Париж бен Каирде — күміс, Ханчжоуда — қола медальға қол жеткізді.
Токио Олимпиадасының қола жүлдегері Софья Берульцева да "Grand Winner" атағына үміткер болған еді. Алайда Рабаттағы шешуші кезеңде топтық кезеңнен өте алмай, қажетті ұпай санын жинай алмады.
