30 маусым мен 7 шілде аралығында елордада өтетін World Boxing ұйымының әлем кубогы кезеңінде Өзбекстан құрамасы рингке шықпайды.
ҚР Туризм және спорт министрлігі Спортты дамыту дирекциясының баспасөз қызметінің жетекшісі Аян Төлеген өзінің Telegram-арнасында бұл жаңалықты жариялады:
"Ұйымдастырушылармен байланысқа шықтық. Өзбекстан боксшылары Астанада өтетін Әлем кубогына мүлде қатыспайды сияқты…", – деп жазды Төлеген.
Қазір World Boxing Әлем кубогының Астанадағы кезеңіне қатысуға 33 елдің құрамасы ресми түрде өтінім беріп үлгерген. Бұл турнир – ұйым аясындағы ең ауқымды бокс оқиғаларының бірі саналады.
Бұған дейін белгілі болғандай, Қазақстан бұл жарысқа ұлттық құраманың үздік спортшыларын шығарады. Жергілікті жанкүйерлер өз елінің боксшыларына зор үміт артып отыр. Турнир отандық спортшылар үшін халықаралық тәжірибе жинауға және рейтингілік ұпай алуға үлкен мүмкіндік болмақ.
