Қазақстанның еңбек сіңірген жаттықтырушысы Тұрсынғали Еділов қазіргі қазақ боксының күйі мен болашағы туралы ойын айтты.
Prosports.kz тілшісі ел боксының ақсақал маманымен тілдесіп, түйткілді сұрақтарға жауап алды.
— Тұрсынғали Нұржақыпұлы, жуырда ұлттық құрама Таиландтағы халықаралық турнирден оралды. Қалай бағалар едіңіз?
— Бұл жарысқа Азия мен Еуропаның мықты құрамалары жиналды. Бірақ біздің мақсат басқа болды — негізгі құрамның біраз жігіті алдағы Әлем кубогына дайындалып жатыр. Сондықтан Таиландқа жас боксшыларды апардық. Олар өздерін жаман көрсеткен жоқ, нәтиже көңілге қонымды. Алаңдайтын ештеңе жоқ.
— Соңғы жылдары Қазақстан боксшылары Өзбекстанмен салыстырғанда төмен нәтиже көрсетіп жүр. Неліктен деп ойлайсыз?
— Бұл – шындық. Бізде сәл құлдырау жүріп жатса, оларда — серпіліс. Мұндай кезеңдер кез келген елде болады. Бірақ бізде әлеует бар. Жас спортшылар көп, облыстарда резерв қалыптасып жатыр. Федерация нақты жұмыс жүргізіп жатыр, табиғи іріктеу процесі басталды.
Ең бастысы – біздің мектебіміз бар. Ол ешқайда кеткен жоқ. Уақыт өте келе бәрі орнына келеді.
— Жақында бұрынғы бас бапкер Дамир Буданбеков боксымыздың бұрынғы жетістіктерін жаттықтырушылар құрамымен байланыстырған еді. Сіз келісесіз бе?
— Әбден келісемін. Қазір тәжірибелі, білікті жаттықтырушылар жетіспейді. Бұрын кеңестік мектептен өткен мамандар болды, өзім де сондай мамандармен жұмыс істедім. Қазір жастар асығыс, дайындыққа және оқу-жаттығу жиындарына үстірт қарайды. Бұл да өз әсерін беріп отыр.
Федерация бұл мәселені жақсы түсініп, жаттықтырушыларға арналған семинарлар өткізе бастады. Жақын арада шетелден де мамандар шақырылады. Жағдай жақсаратынына сенімдімін.
— Жәнібек Әлімханұлы мен британиялық Дензел Бентли арасындағы реванш туралы айтылып жүр. Екінші кездесуде қиындық болуы мүмкін бе?
— Жәнібек бірінші жекпе-жекте Бентлиден басым түсті. Тәжірибе мен шеберлік жағынан ол жоғары. Қазір ол тыңғылықты дайындалып жатыр. Меніңше, реваншта да жеңіске жетеді. Сабырлы, сенімді түрде.
— World Boxing федерациясы гендерлік тестілеуді міндеттеуді көздеп отыр. Сол себепті Иман Хелиф жарыстарға қатыса алмайды. Бұған көзқарасыңыз қандай?
— Мұндай тексерістер бұрыннан болуы керек еді. Қазір медицина алға кетті, кейбір елдерде Олимпиада үшін операция жасатып жатқандар да бар. Бұл — спортқа жат.
Алжирлік боксшы қыздың қатысуына тыйым салынуы – дұрыс шешім. Әлем чемпионаттары мен Олимпиада алдында гендерлік тестілеу міндетті болуы тиіс. Спорт таза, әділетті болуы керек.
— World Boxing ұйымының Олимпиадалық комиссиясын Геннадий Головкин басқарады. Бұған пікіріңіз?
— Бұл — біз үшін үлкен плюс. Гена – салмақты адам, сөзі өтімді. Бұрын әділетсіз шешімдер болып жатса, енді ондайға жол берілмейді деп сенемін. Бұл – біздің спортшылар үшін психологиялық қолдау. Рингте өзіңді сенімді сезіну үшін жоғары жақта қолдайтын адамыңның болуы өте маңызды. Головкин – біз үшін стратегиялық артықшылық.
