Турнирге 23 елдің былғары қолғап шебері келеді.
Астанада 30 мамыр мен 7 маусым аралығында өтетін World Boxing турниріне Өзбекстан құрамасы да қатысады. Бұл туралы Қазақстан бокс федерациясының бас хатшысы Мерей Ақшалов "Бірінші бол" YouTube-арнасына берген сұхбатында мәлімдеді.
Бұған дейін Мәдениет және спорт министрлігіне қарасты Спортты дамыту дирекциясының баспасөз қызметінің жетекшісі Аян Төлеген Telegram-арнасында өзбекстандық боксшылардың турнирге қатыспауы мүмкін екенін жазған. Бұл мәлімдеме спорт жанкүйерлері арасында үлкен сұрақ туындатқан.
Мерей Ақшалов сұхбат барысында қатысушы елдер тізімін нақтылады:
"Қазір 23 ел өзінің қатысатынын растады. Турнирге мықты боксшылар келеді. Көптеген қызықты жекпе-жектер күтіп тұр. Ағылшындар, бразилиялықтар, голландиялықтар, канадалықтар және көршілес мемлекеттер спортшылары рингке шығады", — деді ол.
Өзбекстан жайлы нақты сұрақ қойылғанда Ақшалов:
"Өзбекстан да келеді. Олар жақын ғой", — деп қысқа да нұсқа жауап берді.
