Астана төріндегі World Boxing әлем кубогында Қазақстан намысын қорғау мәртебесі Сағындық Тоғамбайға бұйырды.Ол ширек финалда америкалық боксшымен қолғап түйістірді.
90 келіге дейінгі салмақ дәрежесінде өткен бұл кездесу – нағыз тартысты өткен айқастардың бірі болды. Сағындықтың қарсыласы АҚШ-тың алты дүркін чемпионы Малачи Джорджес еді. Алайда америкалықтың барлық атақ-дәрежесі қазақ боксшысының алдында тосқауыл бола алмады.
Тоғамбай төрешілердің бір ауыздан шығарған шешімімен жеңіске жетті. Осылайша ол турнирдің жартылай финалына шығып, кемінде қола медаль алады.
Малачи Джорджес АҚШ-та аса беделді спортшы, бірнеше мәрте ел чемпионы атанған. Бірақ қазақстандық спортшы оның шабуылдарын дер кезінде тойтарып, тактикалық тұрғыда басым екенін дәлелдеді.
Бір ерекшелігі – Сағындық жекпе-жек барысында сабырлы қалпын сақтап, қарсыластың қатты соққыларынан сытылып кете алды.
Тоғамбай жастар арасында үш дүркін Азия чемпионы. Ал ересектер арасында 2022 жылғы Азия чемпионатының және 2022 жылғы Жазғы Азия ойындарының қола жүлдегері.
