Грек-рим күресінен Қазақстан жастар құрамасында қаржылық қиындықтарға байланысты даулы жағдай болды. Жаттықтырушы Айдын Сәрсекеев Азия чемпионатына жеке қаражатымен барғанын мәлімдеді.
Sportbugin.kz порталының жазуынша, грек-рим күресінен U20 құрамасының бапкері Айдын Сәрсекеев Бішкекте өткен Азия чемпионатына бару үшін банк несиесін рәсімдеуге мәжбүр болған.
“Маған Олимпиадалық даярлау орталығы барлық балуандарды апаруға қаражат жетпейтінін айтып, бір спортшыны тізімнен алып тастауымды сұрады. Бірақ бапкер ретінде бір балуанды сыртта қалдыруға дәтім бармады. Сол себепті өзіме бөлінген қаржыны сол спортшыға бердім”, – дейді Сәрсекеев.
Ол өз есебінен жол шығынына, жатын орын мен тамаққа шамамен 480 мың теңге жұмсағанын, ал бұл сома үшін 500 мың теңге көлемінде кредит алғанын жеткізді.
“Чемпионаттан кейін барлық шығынды құжатпен растадым. Ұйым бұл қаражатты қайтаратынын айтты”, – дейді жаттықтырушы.
Тағы бір назар аударатын мәселе – командаға бірыңғай спорттық киімнің берілмеуі. Жарысқа әркім өзіндегі ескі формамен қатысқан.
“Азия чемпионатына дайын форма болмады. Әлем чемпионатына дейін дайын болады деп сендірді. Бірақ Бішкекте марапаттау рәсіміне бір-біріміздің формамызды киіп шығуға тура келді. Бір сөзбен айтқанда, ала-құла күйде жүрдік”, – дейді Сәрсекеев.
