Қазақстандық UFC жұлдызы Шавкат Рахмонов отандасы Асу Алмабаевтың алдағы жекпе-жегінде секундант ретінде қасынан табылмақ. Бұл шайқас 26 шілде күні Абу-Дабидегі Etihad Arena аренасында өтеді.
Асу Алмабаев (21-3, UFC рейтингінде №9) келесі кездесуін Перу елінің өкілі Хосе Очоаға (8-1) қарсы өткізеді. Бұл — Алмабаев үшін өте маңызды кезең. Себебі ол UFC-дегі алғашқы бес жекпе-жегінде жеңіске жеткенімен наурыз айында Манел Капеден жеңіліп қалған болатын. Алдағы жекпе-жек — оның қайтадан жеңісті жолға түсуіне мүмкіндік.
Шавкат Рахмонов (“Номад”) — әлемдік деңгейде танымал қазақстандық файтер. Ол бұл кездесуде секундант рөлін атқарып, Асуға рухани және тактикалық қолдау көрсетпек. Мұндай рөл қазіргі ММА әлемінде ерекше маңызға ие. Секундант — тек кеңес беруші емес, сонымен қатар спортшының эмоциялық күйін басқаруға, жеңіске жетуге бағыт беретін тұлға.
Асу Алмабаев журналистерге берген сұхбатында Шавкаттың қасынан табылатынын өзі растады.
