Асу Алмабаев алдағы перулық Хосе Очоамен өтетін жекпе-жек алдында UFC тарапынан қаржылай бонусқа ие болды.
UFC промоушені турнир алдындағы медиа және жарнамалық шараларға қатысқан спортшыларға арнайы сыйақы төлеу жүйесін енгізді. Бұл туралы UFC-ке жақын телепродюсер Джед Гудман мәлімдеді.
Барлық қатысушылар бес санатқа бөлінген. Әрбір санаттағы төлем мөлшері спортшының UFC-дегі тәжірибесіне байланысты есептеледі.
Асу Алмабаев үшінші санатқа еніп, 6 мың доллар (шамамен 3 млн теңге) алады. Ал қарсыласы Хосе Очоа бірінші санатқа кіріп, 4 мың доллар көлемінде сыйақы алады.
Бірінші санатқа UFC-де 1-3 жекпе-жек өткізген спортшылар кіреді. Тәжірибесі артқан сайын сыйақы мөлшері де өседі. Мысалы титулдық айқастарға қатысушыларға 32 мың доллар, ал чемпиондарға 42 мың доллар төленеді.
Еске сала кетейік, Асу Алмабаев пен Хосе Очоаның айқасы 27 шілдеге қараған түні өтеді. Жекпе-жек Абу-Дабиде UFC on ABC 9 турнирі аясында ұйымдастырылады. Айқас Астана уақытымен шамамен 00:20-да басталады. Екі спортшы да таразыланудан сәтті өтті.
