Аса ауыр салмақта өнер көрсететін боксшымыз Иван Дычко 13 қыркүйекте өтетін Канело – Кроуфорд супер жекпе-жегінің андеркарды аясында америкалық Джермейн Франклинге қарсы шығады.
Аса ауыр салмақтағы қазақстандық боксшы Иван Дычко алдағы жекпе-жек қарсаңында мәлімдеме жасады. Ол 13 қыркүйекте АҚШ боксшысы Джермейн Франклинге қарсы шығады. Бұл кездесу әлем назарын аударған Сауль «Канело» Альварес – Теренс Кроуфорд супер жекпе-жегінің андеркардына енгізілген.
«Мен үшін бұл – жаңа деңгей. Әлемдегі ең үлкен оқиғалардың бірі, мен үшін де үлкен мүмкіндік. Франклин тәжірибелі қарсылас. Мен мықты жекпе-жекке дайындалып жатырмын.
Бұл менің мансабымдағы маңызды айқастардың бірі болмақ. Қиын болуы мүмкін, бірақ мен эмоционалды тұрғыда тынышпын. Қысым сезбеймін. Жанкүйерлер тамаша бокс пен керемет нокаут көреді», – деді Дычко The Ring басылымына.
Айта кетейік, Иван Дычко шілде айында америкалық Самуэль Кросды бірінші раундта-ақ нокаутпен жеңген болатын.
