Санкт-Петербургте өткен IBA.PRO 10 турниріндегі сәтсіз өнер көрсетуден кейін өзбек боксшысы Баходир Джалолов көпшілікті таңғалдырды.
Өзбек журналисі Джалол Ахмедовтың хабарлауынша, Олимпиаданың екі дүркін чемпионы 14 қараша күні Ташкентте өтетін кәсіпқой бокс кешінде қайта жұдырықтасады. Алайда әзірге Жалоловтың қарсыласы кім болатыны белгісіз. Кездесу Lift Promotion компаниясының ұйымдастыруымен өтпек.
Еске сала кетсек, Баходир Джалолов соңғы рет Санкт-Петербургте Виталий Кудуховпен қолғап түйістірген. Бұл кездесуде «өзбек алыбы» өзіне тән сенімді өнер көрсете алмай, жанкүйерлердің көңілінен шықпады.
Оған дейін Астанада өткен жекпе-жекте Джалолов украиналық Игорь Шевадзуцкийді жеңгенімен, айқын басымдық таныта алмады. Екі жекпе-жекте де ол төрешілердің бірауыз шешімімен жеңіске жетті. Бірақ рингтегі үстемдігі бұрынғыдай әсер қалдырмады.
