Сьюдад-Хуарес (Мексика) қаласында өткен бокс кешінің басты айқасында жергілікті қос танымал боксшы кездесті. Екінші жеңіл салмақтағы (59 кг дейін) жекпе-жекте бұрынғы әлем чемпионы Маурисио Лара (29-3-2, 22 КО) тәжірибелі қарсыласы, бірнеше мәрте әлем чемпионы атағына үміткер болған Мигель Романды (71-15, 51 КО) бірінші раундта-ақ техникалық нокаутпен жеңді.
Жекпе-жек баяу басталды — екі боксшы да өз қашықтығын іздеді. Лара қарсыласының денесіне дәл соққылар бағыттап, күшті хуктермен қысым көрсетті. Ал Роман бұрышқа қысып, соққымен жауап беруге тырысты.
Раундтың ортасына қарай Лара оң қолымен дәл кросс соғып, қарсыласын тізе бүктірді. Бұрынғы чемпион шабуылды үдете түсті — Роман арқанның қасында қорғана бастағанымен бірнеше ауыр соққы өткізіп алды.
Лараның сол қолымен жақсүйегіне бағытталған екі дәл соққысы Мигель Романды есеңгіретті. Арқан ғана оны құлаудан сақтап қалды. Рефери жағдайды дер кезінде бағалап, кездесуді тоқтатты.
Нәтижесінде Маурисио Лара бірінші раундта техникалық нокаутпен (ТКО 1) сенімді жеңіске жетті.
Бұл жеңіс мексикалық боксшының беделін қайта арттырды. Еске салсақ, Лара бұған дейін әлем чемпионы белбеуін иеленіп, соңғы жылдары қайтадан жоғары деңгейге оралуды мақсат еткен.
