Лара мен болатын жекпе-жекте бірден үш белбеу тігіледі.
Орта салмақта WBO және IBF тұжырымдары бойынша әлем чемпионы Жәнібек Әлімханұлы осы салмақтағы WBA белбеуінің иегері, кубалық Эрисланди Ларамен жекпе-жек өткізу туралы келісімшартқа қол қойды.
Әлімханұлы мен Лараның кездесуі АҚШ-тың Техас штаты, Сан-Антонио қаласында өтетін Айзек Крус — Ламонт Роуч кіші бокс кешінің екінші басты жекпе-жегі болады. Қазақстан уақытымен бұл шоу 7 желтоқсан күні таңертең өтеді.
Белгілі америкалық инсайдер әрі спорт шолушысы Дэн Рафаэль бұл туралы әлеуметтік желідегі парақшасында жазды:
«Екі тараптың деректеріне сәйкес, Жәнібек пен Top Rank командасы орта салмақтағы үш белбеу үшін өтетін біріктіруші жекпе-жекке қол қойды. Бұл кездесу PBC Prime Video платформасындағы 6 желтоқсандағы PPV-кештің екінші басты оқиғасы болады, ал басты жекпе-жек — “Питбуль” (Айзек Крус) пен Роучтың айқасы», — деп мәлімдеді ол.
