Қазақтың жеңісі ұрланды — IBA мен Кремлев ұятқа қалды

Нокдаун болды, бірақ жеңіс берілмеді

Абу-Дабиде (БАӘ) өтіп жатқан IBA нұсқасы бойынша әлем чемпионатында Қазақстан құрамасы алғашқы даулы жекпе-жегін бастан кешті.

80 келіге дейінгі салмақта рингке шыққан Ерасыл Жақпеков ресейлік Джамбулат Бижамовты жекпе-жек барысында нокдаунға жіберді. Соған қарамастан кездесу соңында қазылар шешімімен қазақстандық боксшы 1:4 есебімен жеңілді.

Ресми хаттама бойынша жеңіс ресейлік боксшыға жазылды, ал Жақпеков турнирден шығып қалды.

Instagram-да жарылған ашу: «IBA – ұят!»

Даулы шешімнен кейін қазақстандық жанкүйерлер ашуын әлеуметтік желіден шығарды. Пікірлердің басым бөлігі төрешілік пен IBA-ға бағытталды.

Жанкүйерлердің арасында мынадай пікірлер көп кездесті (мазмұны бойынша):

• «Турнирдің қожайыны да, ықпалы да – Ресей. Бәрі солардың пайдасына жұмыс істеп тұр»
• «Боксқа – ұят. Мұндай төрелік спортты өлтіреді»
• «Жақпеков бүкіл жекпе-жек бойы бірінші нөмірмен жұмыс істеді, үнемі прессинг. Бұл жерде қазақ жеңгені анық еді. Жеңісті тартып алды ғой»
• «Бұл – IBA ғой. Таңғалатын ештеңе жоқ. Әдеттегі сценарий»
• «АИБА президенті Кремлев Ресейді қолдап отыр, өз жігіттерін сүйреп әкетуде. 2 және 3-раунд Ерасылдікі еді»
• «Біздің боксшыларды қасақана “құртады”, өздері ғана алтын алсын деп отыр»
• «Бүкіл команда болып турнирден бас тартып, кетіп қалған да дұрыс сияқты»
• «IBA өзгермейді екен. Тағы да ұят төрелік»

Кейбір жанкүйерлер тіпті төрешілерге ақша төленгенін тұспалдап, турнир ұйымдастырушыларының тәуелсіздігіне күмән келтірген.