14 желтоқсан күні қазақстандық боксшы Садриддин Ахмедов (14-0, 12 КО) АҚШ-тың Калифорния штаты, Санта-Инез қаласында өтетін Hollywood Fight Nights Show аясында америкалық Рафаэль Игбоквемен (17-5, 7 КО) басты жекпе-жекке шығады.
Жекпе-жек күні – 14 желтоқсан, сенбі. Тікелей трансляция Қазақстан уақытымен таңғы сағат 08:00-де басталады және UFC-дің ресми сайтында қолжетімді болады. Кеш бағдарламасында алты кездесу жоспарланған, олардың ішіндегі ең маңыздысы — Ахмедов пен Игбокве арасындағы текетірес.
Садриддин Ахмедов соңғы рет шаршы алаңға тамыз айында шығып, америкалық Антонио Тоддты (17-12, 9 КО) бірінші раундта нокаутқа түсірген болатын. Бұл 2022 жылдың желтоқсанынан кейінгі қазақстандық боксшының алғашқы кездесуі еді. Ал Рафаэль Игбокве соңғы рет 2023 жылдың қазанында жекпе-жек өткізіп, Имода Луисты (7-3, 4 КО) ұпай санымен жеңген.
