Ямалдың әлсіз тұсы әшкере болды: Флик ашып айтты
18 жастағы вундеркинд ірі матчтарда тоқсан минут жоғары қарқында ойнай алмауы да содан екен.
«Барселона» бас бапкері Ханси Флик 18 жастағы вундеркинд Ламин Ямалдың басты проблемасын атап өтті. Неміс маманның пікірінше, жас вингер ірі матчтарда қарқынын толық сақтай алмайды және физикалық төзімділік – оның қазіргі дамуына ең үлкен кедергі.
Don Balon дерегінше, ПСЖ-ға қарсы ойында Ямал алғашқы таймда жарқырап, бірнеше қауіпті шабуыл ұйымдастырған. Бірақ 60-шы минуттан кейін оның ойыны бәсеңдеп, ал 75-ші минутқа қарай алаңдағы белсенділігі мүлде азайған. Қарсыласты алдап өту мен өткір пастардың орнына ол тек қысқа паспен шектеліп, ойынға ықпалы төмендеген.
Флик не дейді?
Ханси Флик бұл жағдайды уақытша қиындық деп санайды:
«Ламин – ерекше талант. Бірақ қазіргі таңда оның басты кемшілігі – физикалық дайындық. Біз оған арнайы бағдарлама жасап жатырмыз. Жас ойыншы толық 90 минут бойы жоғары деңгейде ойнай алатын дәрежеге жетуі тиіс».
Клубтың жаттықтырушылар штабы ойыншының төзімділігі артқан жағдайда ол «Барсаның» тұрақты лидері атанатынына сенімді.
Жаһандық деңгейдегі жұлдыз
Айта кетейік, Ямал жақында әлемнің ең үздік жас футболшыларының бірі ретінде аталды. Каталондық клуб дәл қазір оның әлеуетін толық ашу үшін барлық жағдай жасап отыр.