Кенжебек пен Қасым УЕФА таңдаған үздіктер қатарына енді
2026 жылғы ӘЧ іріктеу кезеңінің 7-турынан кейін екі қазақстандық футболшы Ғалымжан Кенжебек пен Әлібек Қасым ерекше жаңалық алды. Оларды УЕФА аптаның үздік құрамына енгізді.
Қос ойыншысымыз — турдың үздіктері
«Елімай» ФК шабуылшысы Ғалымжан Кенжебек пен «Ақтөбе» қорғаушысы Әлібек Қасым 7-турдың ең үздік ойыншылары қатарынан табылды.
Олармен бірге бұл тізімге әлем футболының жұлдыздары — Килиан Мбаппе (Франция), Марк Арнаутович (Австрия), Коди Гакпо (Нидерланд) және Йозуа Киммих (Германия) сынды танымал ойыншылар да енді.
Қазақстан – Лихтенштейн: сенімді жеңіс және жарқын ойын
Астанада өткен Қазақстан – Лихтенштейн кездесуінде алаң иелері 4:0 есебімен жеңіске жетті.
Ойынның басты кейіпкерлерінің бірі Ғалымжан Кенжебек дубль авторы атанып, бір нәтижелі пас берді. Ал Әлібек Қасым қарсылас қақпасына бір гол соғып, қорғаныста сенімді ойынымен көзге түсті.