Бір күнде 26 гол: Қазақстан әйелдер құрамалары үш матчта ірі есеппен жеңілді
Футболдан Қазақстан әйелдер құрамасы, U-19 және U-17 командалары бір күнде үш халықаралық кездесуде жеңіліп қалды.
U-19 құрамасы Чехияға есе жіберді
19 жасқа дейінгі Қазақстан қыздар құрамасы Еуропа чемпионаты-2027 іріктеуінің бірінші кезеңіндегі екінші турда Чехиямен кездесті.
Мальтада өткен матчта қазақстандық футболшылар 0:9 есебімен жеңілді.
U-17 командасы Германиядан ұтылды
17 жасқа дейінгі қыздар құрамасы да қарсыласына тоғыз гол айырмасымен жол берді. Еуропа чемпионаты-2027 іріктеуінің алғашқы турында Қазақстан Германиядан 0:9 есебімен ұтылды.
Кездесу Германияның Майндағы Франкфурт қаласында өтті.
Астанада сегіз гол жіберді
Әйелдер құрамасы әлем чемпионаты-2027 іріктеу плей-оффының бірінші кезеңіндегі алғашқы матчта Ирландияны қабылдады.
"Астана Аренадағы" ойын қонақтардың 8:0 есебімен жеңісімен аяқталды. Сөйтіп Қазақстанның үш құрамасы бір күнде өз қақпасына 26 гол жіберіп, бірде-бір гол соға алмады.
Алдағы кездесулердің кестесі:
12 қазан: Қазақстан U-19 – Мальта;
12 қазан: Қазақстан U-17 – Чехия;
13 қазан: Ирландия – Қазақстан. Ұлттық құраманың қарымта матчы Корк қаласында өтеді.