Неймар алты минутта дубль жасап, "Сантосты" жеңілістен құтқарды
Неймар Бразилия чемпионатының 29-турында "Фламенгоға" қарсы екі пенальтиді дәл орындап, "Сантосқа" бір ұпай алып берді.
Қосалқы құрамнан шығып, есепті теңестірді
Сантус қаласында өткен ойында қонақтар алдымен екі гол соқты. Данило мен Лукас Пакета мергендігімен көзге түсіп, "Фламенгоны" алға шығарды.
Екінші таймда алаңға шыққан Неймар матчтың нәтижесіне тікелей әсер етті. Бразилиялық шабуылшы алты минут ішінде екі пенальтиді голға айналдырып, есепті теңестірді.
Сөйтіп "Сантос" өз алаңында жеңілістен құтылып, чемпионат көшбасшысымен ұпай бөлісті.
"Сантос" сегізінші орынға түсті
Бұл тең нәтиже "Сантостың" қатарынан бес матчқа созылған жеңіс сериясын тоқтатты. Команда 42 ұпаймен турнир кестесінің сегізінші сатысына төмендеді.
Ал "Фламенго" ұпай санын 61-ге жеткізіп, Бразилия чемпионатындағы көшбасшылығын сақтап қалды.
Неймардың Бразилия құрамасындағы көрсеткіші
Неймар ұлттық құрама сапындағы алғашқы ойынын 2010 жылы өткізген. Содан бері Бразилия құрамасы үшін 130 матчқа қатысып, 80 гол соққан. Одан бөлек 59 нәтижелі пас берген.
Неймар – "Сантос" академиясының түлегі. Кәсіби футболдағы жолын осы клубта бастаған шабуылшы 2013 жылы "Барселонаға" ауысты.
Каталониялық командада ол Лионель Месси және Луис Суареспен бірге нәтижелі шабуыл үштігін құрып, ірі клубтық жүлделерді жеңіп алды.
2017–2023 жылдары Неймар ПСЖ сапында өнер көрсетті. Кейін мансабын Сауд Арабиясында жалғастырғанымен жарақаттарына байланысты жиі емделуге мәжбүр болды.
2025 жылы шабуылшы "Сантосқа" қайта оралды. Футболдан бөлек, Неймар покерге қызығушылығымен де танымал: ол ара-тұра турнирлер мен арнайы шоуларға қатысады.