Бақыт Сәрсекбаев аты аңызға айналған әлем чемпионымен кездесті
Қазақстан жастар құрамасының (U-19) аға жаттықтырушысы, Бейжің Олимпиадасының чемпионы Бақыт Сәрсекбаев әлеуметтік желідегі парақшасында ерекше сурет жариялады.
Ыстықкөлдегі күтпеген кездесу
Бақыт Сәрсекбаев Қырғызстандағы оқу-жаттығу жиыны кезінде аты аңызға айналған боксшы Орзубек Назаровпен кездескен. Олимпиада чемпионы Instagram парақшасына екеуінің бірге түскен фотосын жүктеді.
"Ыстықкөлде кімді кездестіріп қалғанымды қараңыз!" - деп жазды Бақыт Сәрсекбаев.
Орзубек Назаров қандай жетістіктерге жеткен?
Орзубек Назаров — Орталық Азияда ең танымал әрі титулды боксшылардың бірі. Кәсіпқой рингте WBA тұжырымы бойынша жеңіл салмақта әлем чемпионы атанып, 1993–1998 жылдар аралығында чемпиондық белбеуін алты рет сәтті қорғаған.
Әуесқой бокстағы басты жетістіктері:
- 1986 жылғы Игі ниет ойындарының жеңімпазы;
- 1986 жылғы әлем чемпионатының қола жүлдегері;
- 1987 жылғы Еуропа чемпионы.
Назаров кәсіпқой мансабында 27 жекпе-жек өткізіп, 26 рет жеңіске жеткен. Оның 19-ын нокаутпен аяқтап, бір ғана кездесуде жеңілген. Үлкен спорттан кеткеннен кейін Қырғызстан парламентінің депутаты болып, Бішкекте өзінің бокс мектебін ашты.
Қазақстандық боксшылар Қырғызстанда дайындалып жатыр
Қазір Бақыт Сәрсекбаев жетекшілік ететін Қазақстанның U-19 жастар құрамасы Ыстықкөлдегі базада Қырғызстанның ересектер құрамасымен бірлескен оқу-жаттығу жиынын өткізіп жатыр. Бұл дайындық жас қазақстандық боксшыларға тәжірибелі қарсыластармен шеберлігін шыңдауға мүмкіндік береді.