Алматы маңындағы Іле Алатауында өткен Salomon Trail жарысында 70 жастағы спортшы Владимир Кривенцов көз жұмды. Дәрігерлер дереу көмек көрсеткенімен өмірін сақтап қалу мүмкін болмады.
Алматы қаласының маңында өткен әйгілі Salomon Trail тау жарысы үлкен спорттық мереке болып өтуі тиіс еді. Алайда жарыс басталған сәтте күтпеген жағдай орын алып, спорт әлемін қайғыда қалдырды.
CentralMedia24kz мәліметінше, жарыс басталғанына бірнеше минут өтпей, 70 жастағы тәжірибелі спортшы Владимир Кривенцовтың жағдайы күрт нашарлаған. Дереу жеткен медицина қызметкерлері мен құтқарушылар оны "Медеу" спорт кешеніндегі құтқару бөліміне жеткізген, бірақ өмірін аман алып қалу мүмкін болмады.
Владимир Кривенцов – Қазақстан спортына еңбегі сіңген, өмірін спортпен байланыстырған тұлға еді.
Ұйымдастырушылардың мәліметінше, Кривенцов жарысқа қатыспас бұрын медициналық тексеруден өткен және дәрігерлер оған қарсы көрсетілім таппаған.
Жарыстың ресми парақшасында келесідей хабарлама жарияланды:
«Владимир Кривенцов көпшілігіміз үшін ерік-жігердің, белсенді өмір салтының жарқын үлгісі еді. Оның жарысқа деген адалдығы мен спортқа деген махаббаты бізді әрдайым жігерлендірді. Марқұмның отбасына, жақындары мен жанашырларына қайғырып көңіл айтамыз», – делінген хабарламада.
