ММА жауынгері Қуат Хамитов әлеуметтік желіде әзілге толы жазба жариялап, ONE Championship-тің бұрынғы чемпионы Қайрат Ахметовтің бір "ерекшелігін" күлкілі форматта айтып берді.
Хамитов Ахметовпен түсірген қысқа видеоны бөлісіп, алдымен алдыңғы жазбасы жоғалып қайта түсіріп жатқанын жеткізеді. Одан кейін Қайраттың жекпе-жекке бір ай қалғанда "дайындық режимі" өзгеше болатынын әзілмен сипаттайды.
Хамитовтың айтуынша, жекпе-жекке тура бір ай қалғанда Қайрат жұма күні жұма намазына, сенбіде Буддаға, жексенбіде шіркеуге барып үлгереді.
Осыны әзілмен түйіндеген Хамитов: "Қайрат — әлемдегі жалғыз әмбебап боец" деп қалжыңдайды. Сондай-ақ жеңістен кейін "үйге барып, толық босаңсып кететінін" де күлкімен жеткізеді.
Қуат Хамитов 16 ақпанда Батумиде GFC 36 x GBC 4 турнирінде октагонға шығып, бразилиялық Алан Сильваны төрешілердің бір ауыздан шығарған шешімімен жеңді.
Қайрат Ахметов биыл қаңтар айының басында Ресейдің ACA промоушенінде алғаш рет өнер көрсетті. Грозныйда өткен ACA 198 турнирінде жергілікті файтер Мансур Хатуевты төрешілердің екіге бөлінген шешімімен ұтты.
