Сәпиев, Сәрсекбаев және Артаев 10 жыл бұрынғы суретті қайталады
Қазақстан боксының даңқты өкілдері, Олимпиада чемпиондары Серік Сәпиев, Бақтияр Артаев және Бақыт Сәрсекбаев жанкүйерлер назарын аударған ерекше сурет жариялады.
Артаев ескі суретті көрсетті
2012 жылғы Лондон Олимпиадасының чемпионы Серік Сәпиев Instagram парақшасында Бақыт Сәрсекбаев және Бақтияр Артаевпен бірге түскен жаңа суретін жариялады.
“Олимпиада чемпиондарымен тамаша кездесу”, — деп жазды Сәпиев жариялаған жазбасында.
Кейін бұл жазбаға Бақтияр Артаев та назар аударды. Ол өзінің әлеуметтік желідегі парақшасында осыдан 10 жыл бұрын түсірілген фотосуретті көрсетті. Ескі кадрда да дәл осы үш Олимпиада чемпионы бірге тұрған. Осылайша қазақстандық бокс жанкүйерлері ел спорты тарихында ерекше орны бар үш тұлғаның жылдар өткеннен кейін қайта бас қосқан сәтін көрді.
Үшеуі де бір салмақта Олимпиада чемпионы атанды
Серік Сәпиев, Бақтияр Артаев және Бақыт Сәрсекбаев — Қазақстан боксының ең жарқын есімдерінің қатарында.
Бақтияр Артаев 2004 жылы Афины Олимпиадасында алтын медаль жеңіп алды. Бақыт Сәрсекбаев 2008 жылы Бейжің Олимпиадасында чемпион атанды. Ал Серік Сәпиев 2012 жылы Лондонда Қазақстан қоржынына алтын жүлде салды.
Үш боксшы да 69 келіге дейінгі дәрежеде өнер көрсетіп, Олимпиада шыңын бағындырған. Сонымен қатар Артаев пен Сәпиев Олимпиада ойындарының техникасы ең жоғары боксшысына берілетін Вэл Баркер кубогының иегері атанды.
Қазіргі қызметтері қандай?
Қазіргі таңда Серік Сәпиев Қазақстан бокс федерациясының вице-президенті қызметін атқарады. Бақтияр Артаев Қызылорда облысының дене шынықтыру және спорт басқармасын басқарады.
Ал Бақыт Сәрсекбаев биыл Қазақстанның жасөспірімдер құрамасының, яғни U-19 командасының аға жаттықтырушысы қызметіне тағайындалды.