Өзбекстанның Ұлттық Олимпиада комитеті өз спортшыларының жалпыкомандалық есепте өзгелерден басым түскенін алға тартады.
Бокстан алғаш рет World Boxing ұйымының аясында өткен тарихи Азия чемпионатында Өзбекстанның Ұлттық Олимпиада комитеті өз спортшыларының жалпыкомандалық есепте Қазақстаннан басым түскенін мәлімдеді.
Иорданияның Амман қаласында өткен бокстан Азия чемпионаты (U15 және U17) өз мәресіне жетті. Бұл құрлықтық дода World Boxing патронажымен тұңғыш рет ұйымдастырылған болатын.
Өзбекстанның ҰОК ресми Telegram-арнасында жарияланған мәліметке сәйкес:
«Амманда өткен Азия чемпионатында өзбек спортшылары 8 алтын, 7 күміс және 4 қола медаль иеленді. Жалпыкомандалық есепте, жинаған ұпай саны бойынша, Өзбекстан бірінші орынға шықты. Екі жас санатында да (U15 және U17) Өзбекстан 15 алтын, 15 күміс және 12 қола медаль жеңіп алды», – делінген ресми хабарламада.
Бұған дейін қазақстандық тарап чемпионаттағы табысты көрсеткіштер негізінде жалпыкомандалық есепте бірінші орын алғанын мәлімдеген еді. Алайда Өзбекстан тарапы бұл мәліметке қарсы уәж айтып, ұпай санын басты өлшем ретінде ұсынып отыр.
Бұл чемпионаттың басты ерекшелігі – оның World Boxing ұйымының ресми қолдауымен бірінші рет өткізілуі. Сол себепті жарыстың форматы мен бағалау критерийлерінде өзгешеліктер болуы мүмкін.
