Жәнібек Әлімханұлының промоутерлік компаниясы – атақты Top Rank – ESPN телеарнасымен серіктестігін тоқтатуы мүмкін. Бұл жағдай қазақстандық чемпионның болашақ жекпе-жектеріне тікелей әсер етуі ықтимал.
Орта салмақтағы IBF және WBO тұжырымы бойынша әлем чемпионы Жәнібек Әлімханұлының мүддесін қорғайтын Top Rank промоутерлік компаниясының болашағы бұлыңғыр. Боб Арум басқаратын атақты ұйым ESPN телеарнасымен келісімшартты ұзартпауы мүмкін. Бұл жағдай қазақ боксшысы үшін де қауіп төндіріп отыр.
vRINGe.com дерегінше, Top Rank компаниясы ESPN арнасымен келісімшарт аясындағы соңғы бокс кешін 26 шілдеде өткізеді. Аталған кештің басты жекпе-жегі – Ксандер Зайас пен Хорхе Гарсия арасындағы айқас болмақ.
Бұл күннен кейін компания уақытша үзіліс алмақ, ал тамыз айына ешқандай шоу жоспарланбаған. Себебі ESPN ұсынған жаңа шарттар Top Rank басшылығын қанағаттандырмай отыр. Келіссөздер ұзаққа созылып кеткен, ал егер тараптар ортақ шешімге келе алмаса, Top Rank-тің болашақ шоулары қандай платформадан көрсетілетіні белгісіз.
Қазақстандық боксшы Жәнібек Әлімханұлы (17-0, 12 KO) осы компанияның қорғауында. Top Rank пен ESPN серіктестігінің үзілуі оның жекпе-жек жоспарына тікелей әсер етуі мүмкін.
2023 жылы Жәнібек салмақ қууда қиындыққа тап болғаны үшін компаниямен келісімшарт бұзылады деген қауесет тараған. Алайда боксшы бұл мәліметті жоққа шығарды.
«Қазақ стилі» Карлос Адамеспен (24-1-1, 18 KO) WBC белбеуі үшін айқасуды көздеп жүргенін бірнеше рет мәлімдеген.
Жәнібек Әлімханұлы соңғы жекпе-жегін Астанада өткізіп, камерундық Анауэль Нгамиссенгені 5-раундта техникалық нокаутпен жеңген болатын.
