UFC-дің жеңіл салмақтағы бұрынғы уақытша чемпионы Тони Фергюсон октагонға қайта оралуы мүмкін екенін айтты. Оның сөзінше, тек екі жекпе-жекке келісуге дайын: Хабиб Нурмагомедов немесе Конор Макгрегорға қарсы айқас.
"UFC-де өткізгім келетін жалғыз екі айқас бар – ол Конор Макгрегормен немесе Хабибпен жекпе-жек. Хабиб әлемдік турын аяқтай салысымен онымен айқасуға дайынмын. Бізде біраз аяқталмаған істер бар. Бірақ олардың екеуі де маған қарсы шықпайды деп ойлаймын. Оларға бұл қажет емес сияқты", – деді Фергюсон Bloody Elbow басылымына берген сұхбатында.
Тони Фергюсон ұзақ уақыт бойы жеңіл салмақтағы ең мықты спортшылардың бірі саналды. Ол қатарынан 12 жекпе-жекте жеңіске жетіп, уақытша чемпиондық белбеуді иеленген еді.
Алайда 2020 жылы Джастин Гэтжиден жеңілген соң, америкалық файтер ауыр кезеңді бастан өткерді. Содан бері ол жеті рет қатарынан жеңіліп, дивизион элитасындағы орнын жоғалтты.
