Орта салмақтағы екі чемпиондық атақ үшін өткен британдық бокс кеші нокаутпен аяқталды. Жергілікті Джордж Лиддард (13-0, 8 КО) өз отандасы Кирон Конвейді (23-4-1, 7 КО) техникалық нокаутпен жеңіп, Ұлыбритания мен Достастық елдері чемпионы атақтарын иеленді.
Жекпе-жек Лондонда өтті. Джордж Лиддард айқастың басынан соңына дейін қарсыласын толық бақылауда ұстады. Тоғызыншы раундта Конвейді нокдаунға түсірді. Ал оныншы раундта Конвей бұрышы рингке орамал тастап, жекпе-жекті тоқтатуға мәжбүр болды.
Айта кетсек, дәл осы орта салмақ санатында Қазақстанның мақтанышы, Жәнібек Әлімханұлы (17-0, 12 КО) өнер көрсетеді. Ол қазір WBO және IBF нұсқалары бойынша әлем чемпионы белбеулерінің иегері саналады.
