Қазақстан бокс федерациясы (ҚБФ) басшылық құрамында кадрлық рокировка жүргізді. Сидней-2000 Олимпиадасының күміс жүлдегері Мұхтархан Ділдәбеков ҚБФ-тың жалпы мәселелер бойынша вице-президенті қызметіне тағайындалды.
ҚБФ-тың ресми Instagram парақшасында жарияланған ақпаратқа сәйкес:
Мұхтархан Қабыланбекұлы Ділдәбеков — Олимпиада ойындарының және бокстан әлем чемпионатының күміс жүлдегері;
2024 жылдың ақпанынан бері ҚБФ-те жаттықтырушылар құрамымен жұмыс жөніндегі вице-президент қызметін атқарған;
Енді ол отандық боксты дамыту, сондай-ақ ішкі үйлестіру бағыттарына жауап береді.
Айта кетейік, Ділдәбеков бұған дейін ҚБФ-те жаттықтырушылар құрамымен жұмысқа жауапты вице-президент болатын. Алайда бүгін бұл лауазымға Қазақстан ерлер құрамасының бұрынғы бас бапкері Қайрат Сәтжанов ресми түрде тағайындалды.
Еске сала кетсек, Қайрат Сәтжановтың ұлттық құрамадан кетуі қоғамда кең талқыланып, дау-дамайға ұласқан. Әсіресе, оның қызы Еңлік Сәтжанованың Instagram желісіндегі резонансты мәлімдемесі көпшіліктің назарын аудартқан.
