Санжар Тәшкенбай қарсыласын нокдаунмен "жаншып", алтын алды

50 кг салмақтағы "алтын" жекпе-жек

50 келіге дейінгі салмақ дәрежесінде қазақстандық боксшы финалда ринг иесі испаниялық Исмаэль Маграуи Фриамен қолғап түйістірді. Жекпе-жек Тәшкенбайдың төрешілердің бірауыздан шығарған шешімімен жеңісімен аяқталды.

Ең маңызды сәттердің бірі екінші раундта тіркелді. Қарсыласына нокдаун саналып, Санжар кездесудің қарқынын толық өз қолына алды. Осылайша отандасымыз 2026 жылды беделді турнирдегі алтын медальмен бастады.

Санжар Тәшкенбайдың басты жетістіктері

Тәшкенбай — әлемдік аренада тұрақты нәтиже көрсетіп жүрген боксшылардың бірі. Оның еншісінде:

• Ташкенттегі (Өзбекстан) 2023 жылғы әлем чемпионатының алтыны;
• Ливерпульдегі (Ұлыбритания) World Boxing 2025 әлем чемпионатының алтыны;
• Амманда (Иордания) өткен 2022 жылғы Азия чемпионатының жеңісі бар.

Испаниялық Исмаэль Маграуи Фриа ел ішінде жастар деңгейінде бірнеше мәрте чемпион атанып, жүлде алғанымен, халықаралық жарыстарда әзірге айтарлықтай үлкен табысқа қол жеткізе қойған жоқ.