World Boxing ұйымының қолдауымен Таиландта өтіп жатқан Futures Cup (U19) жастар турнирі Қазақстан құрамасы үшін сәтті басталды.
54 келіге дейінгі салмақ дәрежесінде Марал Төлепберген алғашқы жекпе-жегін шотландиялық Роси Суайлеспен өткізді.
Үш раундқа созылған тартысты кездесудің қорытындысы бойынша төрешілер жеңісті 4:1 есебімен қазақстандық қызға берді. Осылайша Марал турнирдегі алғашқы белесін сәтті еңсерді.
60 келіге дейінгі салмақтағы Досжан Жұмақан 1/32 финалда кениялық Феликс Очиенго Ониангомен қолғап түйістірді.
Жасөспірімдер арасында Азия ойындарының чемпионы бұл кездесуде қарсыласынан әлдеқайда мықты екенін бірден аңғартты. Нәтижесінде төрешілер жекпе-жекті бірінші раундта тоқтатып, жеңісті Жұмақанға берді.
Таиландтағы жастар арасындағы Future Cup турнирі 8-15 наурыз аралығында өтеді.
