Жәнібек пен Шираздың командасы келісімге келе алмады

Промоутерлер WBO-ға өтініш білдірді

Жәнібек Әлімханұлының мүддесін қорғайтын Top Rank пен Хамза Шираздың өкілі Queensberry Promotions келіссөздерді жалғастыру үшін ұйымнан қосымша уақыт сұраған.

"Top Rank және Queensberry Promotions бірлесіп, келісімге қол жеткізу бағытындағы жұмысты жалғастыру үшін келіссөз мерзімін бір аптаға созуды сұрады.

Осыған байланысты тараптарға 2026 жылғы 10 қыркүйек, бейсенбі күні атлантикалық стандартты уақытымен сағат 17:00-ге дейін түпкілікті келісім жасап, оны WBO-ға ұсынуға мүмкіндік берілді", – делінген ұйымның мәлімдемесінде.

Келісім болмаса, промоутерлік сауда өтеді

Егер белгіленген уақытқа дейін тараптар ортақ мәмілеге келе алмаса, WBO чемпиондық комитеті жекпе-жекті өткізу құқығына арналған промоутерлік сауда — purse bid ұйымдастырады.

Бұл жағдайда түрлі промоутерлік компаниялар бокс кешін өткізу үшін өз ұсыныстарын береді. Ең жоғары қаржы ұсынған тарап жекпе-жекті ұйымдастыру құқығына ие болады.

Жәнібек Әлімханұлы жаңа салмаққа ауысты

Еске салайық, Жәнібек Әлімханұлы 2026 жылдың 21 шілдесінде екінші орта салмақ дәрежесіне ауысатынын ресми түрде жариялады. Осы шешімнен кейін қазақстандық боксшы орта салмақта иелік еткен WBO чемпиондық белбеуін өз еркімен босатты.

14 тамызда WBO Жәнібек Әлімханұлын екінші орта салмақтағы әлем чемпионы Хамза Шираздың міндетті қарсыласы ретінде бекітті. Бұдан кейін боксшылардың өкілдеріне титулдық жекпе-жектің қаржылық және ұйымдастырушылық шарттарын келісуге уақыт берілген. 

Енді тараптар 10 қыркүйекке дейін мәміле жасап үлгеруі керек. Келіссөз сәтті аяқталса, Жәнібек Әлімханұлы мен Хамза Шираз арасындағы чемпиондық айқастың өтетін күні мен орны ресми жарияланады.