Қазақстандық еркін күрес шебері Ризабек Айтмұхан Иордания астанасы Амманда өтіп жатқан Азия чемпионатындағы алғашқы белдесуін бар-жоғы 59 секундта аяқтады.
97 келіге дейінгі салмақ дәрежесінде өнер көрсетіп жатқан Айтмұхан іріктеу кезеңінде Индонезия өкілі Мухамад Рудиансиямен жолықты. Белдесу басталысымен-ақ басымдық танытқан Ризабек бар болғаны 59 секундтың ішінде техникалық басымдықпен — 10:0 есебімен айқын жеңіске жетті.
Бұл нәтижемен Айтмұхан жарыстың келесі кезеңіне сенімді түрде өтті.
Айта кетейік, Ризабек Айтмұхан — 2023 жылғы ересектер арасындағы әлем чемпионы (92 кг). Бұдан бөлек, ол жастар (U20) және 23 жасқа дейінгілер (U23) арасында әлем чемпионаттарының алтын жүлдегері атанған. Азия чемпионаттарында да жүлде алған тәжірибелі балуан жаңа салмақ — 97 кг-да өз мүмкіндігін сынап жатыр.
