Қазақстанның бірқатар өңірлерінде бензин және газ бағасының өсуі бақыланды.
Бұған дейін Қазақстанда бензин мен дизель отынының бағасын мемлекет реттеп отырған болатын. Бірақ бұл шектеу 30 қаңтарда күшін жоғалтты.
Елордадағы бірқатар АЗС-те АИ-95 бензинінің бағасы 265 теңгеден 268 теңгеге өсті. Бірақ өткен айда бірқатар жанармай құю бекеттерінде баға 273 теңгеге дейін барған. АИ-92 бензині 205 теңгеден 207 теңгеге өсті.
Алматы қаласында бұрын АИ-92 бензині 205 теңге болған. Қазір кейбір жанармай құю бекеттерінде баға өзгеріссіз қалғанымен, АИ-95 бензинінің бағасы 270 теңгеден 280 теңгеге дейін көтерілді.
Қарағандыда жанармай бағасы 2-3 теңгеге өсті. Қаңтар айында АИ-92 бензині 205 теңге тұрса, қазір 207 теңгеге жетті. АИ-95 маркасының бағасы 263 теңгеге дейін көтерілді. Дегенмен көптеген бекеттерде баға әлі де тұрақты күйінде тұр.
Қаңтар айының соңында Семейде АИ-95 бензинінің бағасы 250-260 теңге аралығында өзгеріп отырды. Қазір баға тағы да көтеріліп, АИ-92 бензині бірнеше теңгеге қымбаттады.
Қостанай қаласында АЗС бекеттері бұрынғы бағаларды сақтап тұр. АИ-95 бензині 255-258 теңге, ал АИ-92 – 204-205 теңге деңгейінде қалып отыр.
Талдықорғанда кейбір жанармай бекеттерінде баға өзгеріссіз қалды. Бірақ кейбір АЗС-те АИ-92 бензині 2-3 теңгеге қымбаттаған.
Бұған дейін Қазақстан Республикасы Энергетика министрлігі жанар-жағармай материалдарының бағасын кезең-кезеңімен ырықтандыру жоспарын жариялаған болатын. Бұл қадам көршілес елдермен баға айырмашылығын азайтуға және "көлеңкелі" экспортты қысқартуға бағытталған. Қазақстан билігі бағаның көтерілуі халықтың әлеуметтік осал топтары мен ауыл шаруашылығы өндірушілерін қолдау шараларымен бірге жүретінін мәлімдеді.
