«Ювентус» футбол клубы мен Adidas компаниясы өзара серіктестігін тағы он екі жылға ұзартып, 2037 жылға дейін жарамды жаңа келісімге қол қойды. Жалпы сомасы 408 миллион еуроны құрайтын бұл ауқымды келісім клубтың спорттық жабдықтарын әзірлеудегі тұрақтылықты қамтамасыз етпек.
Италиялық әйгілі «Ювентус» футбол клубы мен әлемдік Adidas спорттық киім өндіруші бренді арасындағы техникалық серіктестік 2037 жылға дейін ұзартылды. Бұл туралы клубтың ресми сайтында жарияланған хабарламада айтылды. Жаңа келісімнің жалпы сомасы 408 миллион еуроны құрайды және ол 2027/28 маусымынан басталып, 2036/37 маусымының соңына дейін жалғасады.
«Ювентус» клубының ресми хабарламасында былай делінген:
"Juventus Football Club S.p.A. Adidas компаниясымен техникалық серіктестік келісімін 2037 жылдың 30 маусымына дейін ұзартқанын хабарлайды. Қазіргі келісім 2027 жылдың 30 маусымына дейін жарамды және оған ешқандай өзгеріс енгізілмейді. Жаңа келісім 2027/2028 маусымынан басталып, 2036/2037 маусымына дейін (қоса алғанда) жалғасады. Осы уақыт аралығында Adidas Juventus клубының барлық командаларына техникалық серіктес болып қала береді. Бұл серіктестік үшін компания Juventus-қа 408 миллион еуро көлемінде кепілдендірілген қаражат төлейді."
Серіктестікке қосымша табыс көзі ретінде royalty жүйесі енгізіледі — яғни өнімнің сатылым көлемі белгіленген межеден асқан жағдайда, клуб қосымша табыс алады. Сонымен қатар, спорттық нәтижелерге байланысты бонус төлемдер де қарастырылған. Клубтың стратегиялық жоспарына сәйкес (2024/25–2026/27) бұл сома қазіргі келісімшарттағы жылдық табыстармен шамалас болуы мүмкін.
Adidas компаниясы соңғы жылдары «Ювентус» клубының барлық матчтық және жаттығу формаларын жасап келеді. Бұл серіктестік футбол бизнесіндегі ең ауқымды және ұзақ мерзімді келісімдердің бірі саналады. Келісім тек қаржылық емес, сонымен қатар имидждік, маркетингтік және коммерциялық тұрғыдан да маңызды.
Adidas-пен серіктестік «Ювентус»-қа әлемдік нарықта бренд ретінде беделін арттыруға және жанкүйерлер аудиториясын кеңейтуге көмектеседі. Сонымен қатар, бұл келісім клубтың қаржылық тұрақтылығына да оң әсерін тигізетіні анық.
