Португалияның жұлдызды шабуылшысы Криштиану Роналду Сауд Арабиясы чемпионатының жаңа маусымын голмен бастады.
«Әл-Наср» сапындағы форвард бірінші айналымдағы «Әл-Таавунға» қарсы ойында 54-минутта пенальтині сәтті орындап, өзінің мансабындағы жалпы голдар санын 940-қа жеткізді.
Клубтық деңгейде Роналду 802 гол соғып үлгерді. Ол «Спортинг», «Манчестер Юнайтед», «Реал Мадрид», «Ювентус» және қазіргі «Әл-Наср» командаларының намысын қорғап, әрқайсысында өз ізін қалдырды.
Португалия құрамасы сапында ол 138 голдың авторы атанды. Бұл көрсеткіш Криштиануды тек өз елінде ғана емес, әлем футболының тарихында ұлттық құрама үшін ең көп гол соққан ойыншы деңгейіне шығарды.
Жақында Португалия футбол федерациясы ұлттық құраманың алдағы оқу-жаттығу жиынына шақыртылған ойыншылар тізімін жариялады. Сол тізімде 40 жасқа толған Роналду да бар. Жасына қарамастан, ол әлі де жоғары деңгейде ойнап, әлем чемпионаты мен іріктеу матчтарында команда үшін маңызды ойыншы болып қала бермек.
