Алматының «Қайраты» алғаш рет УЕФА Чемпиондар лигасының негізгі кезеңіне жолдама алғанына орай, Astana Motors компаниясының негізін қалаушы Нұрлан Смағұлов клуб бас бапкері Рафаэль Уразбахтинге ерекше сый жасады.
Кәсіпкер маманға Hyundai Palisade кілтін табыстады. Бұл сыйды символикалық мәнмен байланыстырды:
«Біз сіздердің жеңістеріңізбен мақтанамыз. Бұл тек "Қайрат“ үшін емес, бүкіл қазақстандық футбол үшін үлкен қадам. Шын жүректен жаңа жетістіктер тілейміз және әрдайым қолдау көрсетуге дайынбыз. Алда Алматыда өтетін мадридтік "Реалға“ қарсы матч күтіп тұр — бұл әлемдік деңгейдегі оқиға. Біз сіздерге жанкүйерміз. Сіздер қазақстандық футболды дамытасыздар, ал біз қазақстандық автопромды. Бірге еліміздің игілігі үшін еңбек етеміз. Бұл автомобиль де, бүкіл Hyundai үлгілері секілді, Алматыдағы Hyundai Trans Kazakhstan зауытында жасалған. Алматылық көлік — алматылық клубқа», – деді Нұрлан Смағұлов.
Жеңістен кейінгі қуанышта бас бапкер Рафаэль Уразбахтин де алғысын білдірді:
«Мен үшін мұндай сыйды алу — үлкен құрмет. Осындай назар мен сенім үшін алғыс айтамын. Дегенмен, бұл тек менің еңбегім емес, ең алдымен футболшылардың, жаттықтырушылар штабының, медицина қызметкерлерінің және бүкіл клубтың жетістігі. Әрқашан бізге сеніп, қолдап жүрген жанкүйерлерімізге де алғыс айтамын. Біз болашақта да қазақстандықтарды жаңа жеңістермен қуанта береміз», – деді «Қайраттың» бас бапкері.
Назардан тыс қалмаған тағы бір кейіпкер – «Қайрат» пен Қазақстан құрамасының қақпашысы Темірлан Анарбеков. Шешуші пенальти сериясында үш соққыны қайтарып, командаға тарихи жеңіс сыйлаған қақпашыны Нұрлан Смағұлов жеке құттықтап, оған Apple MacBook табыстады. Жас футболшының қолын алып, кәсіпкер:
«Сенің алда үлкен болашағың бар», – деп атап өтті.
«Қайрат» клубының президенті Қайрат Боранбаев бапкердің еңбегін ерекше атап өтті. Оның айтуынша, дәл қазақстандық маман Рафаэль Уразбахтиннің басшылығымен команда тарихи нәтижеге қол жеткізді.
