Облысы әкімі Асхат Шахаров Qazaq Stroy иесі клубты сатып алатынын растады.
"Ақтөбе" футбол клубы жеке инвестордың қолына өтеді. Бұл туралы Ақтөбе облысының әкімі Асхат Шахаров хабарлады. Оның айтуынша, клубтың жаңа иесі Qazaq Stroy компаниясының иесі, жергілікті кәсіпкер Нұрлан Артықбаев болады.
«Кәсіпкер анықталды. Бір-екі айдың ішінде жұмысты толық аяқтаймыз деп ойлаймын. Qazaq Stroy компаниясының жетекшісі клубқа қызығушылық танытты. Өзі Ақтөбеден шыққан, бала кезінде ата-анасымен стадионға барып, клубқа жанкүйер болғанын айтты. Президенттің тапсырмасын орындауға дайын екенін жеткізді», — деді Шахаров.
Әкім клубтың дамуына енді инвестор жауапты болатынын, алайда инфрақұрылым бойынша әкімдік қолдау көрсететінін атап өтті.
Forbes Kazakhstan-ға сенімді дереккөздердің хабарлауынша, клубтың жеке инвесторға өтуі жөніндегі келісім жасалып қойған.
Десе де, әзірге инвестиция көлемі белгісіз. Команда құрылымында қандай өзгеріс болатыны туралы да ақпар жоқ. Сонымен қатар, жатақхана салу немесе ойыншылар құрамын жаңарту мәселесі де беймәлім.
Бұған дейін Асхат Шахаров клубтың 2025 жылдың соңына дейін толық жекешеленетінін айтқан еді, бірақ мүмкін инвестордың есімі жарияланбаған болатын.
«Ақтөбе» — 2025 жылы жеке кәсіпкерлердің қолына өткен төртінші клуб:
«Қайсар» (Қызылорда)
«Қызыл-Жар» (Петропавл)
«Жеңіс» (Астана)
«Ақтөбе»
Сонымен қатар қазіргі уақытта «Шахтёр» (Қарағанды) клубын жекешелендіру мәселесі талқыланып жатыр. Қызығушылық білдірген тарап — Freedom Holding Corp. басшысы Тимур Турлов. Инвестициялар көлемі шамамен 18 млрд теңге болуы мүмкін.
Жекешелендіру процесі «Тараз», «Елімай», «Ертіс» клубтарымен де талқылануда.
