Ресейлік клубтар еурокубок матчтарын Қазақстанда өткізу мүмкіндігін қарастырып жатыр
Ресей Премьер-лигасының бірқатар клубы еурокубоктағы ықтимал үй матчтарын Қазақстан аумағында өткізу бойынша алдын ала келіссөз жүргізе бастаған.
Қазақстандағы үш қала негізгі үміткер аталды
Инсайдер Елдар Аманбаевтың айтуынша, әңгіме келесі маусымға қатысты болып отыр. Бұл сценарий УЕФА ресейлік клубтарды еурокубок турнирлеріне қайта жіберген жағдайда ғана өзекті болуы мүмкін.
Бірақ мұндай жағдайда ресейлік командаларға үй ойындарын өз елінде емес, бейтарап алаңда өткізу талабы қойылуы ықтимал.
“Менің ақпаратым бойынша, РПЛ клубтары өздерінің ықтимал еурокубоктағы үй матчтарын Қазақстанда өткізу жөнінде алдын ала келіссөздерді бастап кетті. Әзірге бұл тек қарастырылып жатқан нұсқалардың бірі, бірақ осы бағытта жұмыс жүргізіліп жатыр”, – деп жазды Аманбаев.
Оның мәліметінше, мұндай кездесулерді қабылдауға басты үміткер қалалар ретінде Алматы, Ақтөбе және Шымкент қарастырылып отыр.
Неге Алматы, Ақтөбе және Шымкент?
Бұл қалалардың таңдалуы бірнеше факторға байланысты. Біріншіден Ресейдің жетекші клубтары әдетте табиғи көгалда ойнайды. Екіншіден аталған қалалардағы стадиондар халықаралық талаптарға сай келуі мүмкін.
Сондықтан Қазақстандағы осы ареналар ресейлік клубтардың бейтарап алаңдағы матчтарын өткізуге қолайлы нұсқа ретінде қарастырылып отыр.
Егер бұл жоспар жүзеге асса, Қазақстанда “Зенит”, “Спартак”, ЦСКА, “Динамо” және РПЛ-дің басқа да танымал клубтарының қатысуымен еурокубок матчтары өтуі мүмкін.
Ресейлік клубтар еурокубоктан қашан шеттетілді?
Ресейлік футбол клубтары 2022 жылдың 28 ақпанында ФИФА мен УЕФА-ның бірлескен шешімімен халықаралық турнирлерден белгісіз мерзімге шеттетілген.
Содан бері Чемпиондар лигасы, Еуропа лигасы және Конференция лигасы сияқты турнирлерге қатысып жүрген жоқ.
Жақында Халықаралық олимпиада комитетінің Ресей Олимпиада комитетінің мәртебесіне қатысты уақытша шешімі талқыланғанымен бұл футболдағы жағдайды түбегейлі өзгерткен жоқ.
Қазір ресейлік клубтардың еурокубоктарға жақын арада қайта оралу ықтималдығы төмен деп бағаланып отыр. УЕФА ресейлік командаларды 2026/2027 маусымындағы еурокубок жарыстарынан да тыс қалдырғаны хабарланған.
Сонымен қатар Англия, Германия, Франция секілді ықпалды футбол федерациялары Ресей командаларын толыққанды қайтаруға әзірге қарсы екені айтылады. Осыған байланысты ресейлік клубтардың еурокубокқа оралу мәселесі кемінде 2027/2028 маусымына қарай ғана нақты талқылануы мүмкін.