Елде спортшылардың еңбекақысын төлеудің жаңа тәртібі бекітілді

Қазақстанда спортшылар мен жаттықтырушылардың еңбекақысын төлеудің жаңа тәртібі бекітілді. Енді ұлттық құрама мүшелері мен бапкерлері ай сайын бірыңғай жүйе бойынша жалақы алады.

Жаңа жүйенің ерекшеліктері

Бұйрыққа сәйкес, спортшылар мен жаттықтырушыларға төленетін айлық төлем көлемі 5-тен 250 айлық есептік көрсеткішке (АЕК) дейінгі аралықта белгіленеді. Бұл реформа бұрынғы жүйеден бірқатар артықшылықтарымен ерекшеленеді:

• Аймақтар арасындағы теңсіздік жойылады. Бұрын әр облыс өз бюджетіне қарай түрлі көлемде төлем жасаған болса, енді барлық өңірде қаржы бірдей бөлінеді.
• Инфляция ескеріліп отыр. Жаңа жүйе төлемді жыл сайын қайта қарауды қажет етпейді, қаржыландыру көлемі инфляцияға байланысты автоматты түрде түзетіледі.
• Қаржылық тұрақтылық. Бұл спортшыларға да, жаттықтырушыларға да тұрақты әрі әділ қолдау көрсетуді қамтамасыз етеді.

Қарағанды облысы жастар құрамасының бас бапкері Асылжан Тілеужанұлы жаңа жүйенің артықшылығын атап өтті:

«Бұрын Қазақстан чемпиондары мен жүлдегерлеріне ай сайынғы төлем әр облыста әртүрлі болатын. Енді жаңа реформа арқылы барлығы теңестірілді. Бұл жаттықтырушыға да, спортшыға да тиімді», – деді ол.