Ұлттық құраманың капитаны Айбек Оралбай Астанада өтіп жатқан World Boxing Кубогының жартылай финалына шықты. Алайда ширек финалдағы жекпе-жек тек спорттық емес, эмоциялық шиеленіске де толы болды.
Ширек финалда Айбек италиялық Диего Ленциге қарсы қолғап түйістірді. Үш раундтық жекпе-жек төрешілердің шешімімен 4:1 есебімен Оралбайдың жеңісімен аяқталды. Бұл шешіммен Ленци келіспеді. Әсіресе үшінші раунд соңындағы нокдаун эпизоды оның наразылығын ушықтырды.
Раундтың соңына қарай рефери италиялық боксшыға нокдаун санады. Бұл сәтке Ленци ерекше наразылық танытып, төрешіге сатиралық шапалақ соғып, көрермендерді айғайлауға шақырды.
Жекпе-жек қорытындысы жарияланған соң, Диего Ленци өз әрекетімен жанкүйерлер мен спорт мамандарын таңғалдырды. Ол Айбек Оралбайға оның бапкерлеріне және рефериге қол беруден бас тартып, ашулы күйде рингтен кетіп қалды. Бұл сәттің видеосы желіде қызу талқылануда.
Айта кетейік, бұл жеңістің арқасында Айбек Оралбай кем дегенде қола медальді еншіледі. Ол енді финалға шығу үшін тағы бір жекпе-жек өткізеді. Айбек бұған дейін екі мәрте Азия чемпионы атанған (2022, 2024), әрі Қазақстан құрамасының капитаны ретінде тәжірибесі мол.
